Mér finnst það alveg svakalega sorglegt þegar fólk þarf að láta reiði sína bitna á einu virtasta húsi landsins. Við fórum í smá göngutúr í gærmorgun með strákinn, byrjuðum niðrá tjörn og gáfum öndunum eða réttarasagt svönunum og Gæsunum brauðbita og röltum svo áfram út á Austurvöll. Eitt það fyrsta sem ég tók eftir þegar þangað var komið var að það var búið að brjóta amk 1 rúðu í öllum gluggunum á framhlið Alþingishússins, veit ekki hvort það gerðist þá um nóttina eða fyrr. Held amk í minni einfeldni að það sé löngu búið að gera við mótmælarúðubrotin síðan fyrr í vetur.
Alþingishúsið er eitt af fáum húsum hér í borg sem mér finnst álíka heilagt og kirkjur og þ.a.l. finnst mér það alveg út í hróa hött þegar fólk ræðst að því húsi með þeirri vanvirðingu að vilja eyðileggja – jájá fólkið sem situr þar inni er margt hvert algert fífl og má alveg finna sér aðra vinnu en ég er ekkert að pæla í því heldur byggingunni sjálfri og því sem hún stendur fyrir, pakkið innandyra er svosem að eyðileggja og vanvirða húsið líka, bara á annan máta.
Þrátt fyrir þetta áttum við notalegan göngutúr í miðbænum og Oliver skemmti sér konunglega við að gefa fuglunum brauðbita 🙂